۱۳۸۲/۱۰/۳

صدام، خیال ایله گرچک دوشرگه سینده! (صدام در گذرگاه خیال و واقعیت)



  • برای بسیاری این سوال وجود دارد که دیکتاتور عراق در واپسین لحضات قبل از دستگیری به چه می اندیشیده است؟ آیا هرگز فکر دستگیری به مغزش خطور کرده بود یا نه؟ آیا در اعماق خوشبختی های پوشالی گذشته شناور بوده یا به بدبختی واقعی ای که در انتظارش بوده می اندیشیده؟

هیچکیم اینانمیردی بو گؤستریلن چیرکین شکیل لر، بو دهشتلی گؤرونتو، بو داغیلمیش سیما همان شخصه عایید دیر کی نئچه آی، یوخ، دوز 9 آی بوندان قاباق عیراقین بیریمجی شخصی ایدی و دوز 9 آی بوندان قاباق ترـ تمیز اردو گئییمی[لباس نظامی] ایله تلویزیون لارین ون کامئرا قارشیسیندا دوروب آمئریکالی پاپیروسو نو[سیگار برگ] اوفلویه اوفلویه، کیمه ایسته سه یدی آغزینا گله نی دئییب و دئیه نی ده اولایدی گره ک.
یوخ، یوخ هئچکیم اینانمیر بونا! حتتا اؤزو ده. باخ تقدیره. اونون اوینونا! آمما 9 آی بوندان اؤنجه، همین تقدیری یازان و اونو معین له شدیرن ائله اؤزو بو شخص ایمیش (دوشوندو)...
دؤکتور آغزینی آچ دئیه رکن آغزین آچیب و دؤکتوره باخدی. موطلق 9 آی بوندان اؤنجه اولسایدی ایندی دؤکترین بو جسارتینین جزاسی اؤلوم ایدی. دؤکتور الینده پلاستیک الجک له [دستکش] قید سیز دیشلرینی بلکه یوخلاییب سونرا قابالیقلا باشین چئویریب توکلرینه باخدی، بوزوشوک توکلر کی نئچه آیلارلا سو رنگینی گؤرمه میشدی! یوخ تقدیره اینانماق بیر آز زور! میلیونلارجا تقدیرلرینی یازان ایندی نئجه تقدیرین الینده کؤله دوشموشدو (باشینا بیت دوشموشدو) اینانیلماز دیر! ائله بیل بو اویونا اینانماق او قدر زور ایدی کی مینلرجه گؤرونتو و کامئرایا لازیم گلیر دی ساکی آدامی ایناندیرسین. ایناندیرسین کی بو گیزلینجه اوز ـ گؤزونده ن یالواریش یاغان کؤله، بو چؤکولموش و ایغرنج چؤهره، ائله همان آدلی دیکتاتور، همان عیراقین تانینمیش رهبری « صدام حسین » دیر. همان مغرور دیکتاتور کی ان کیچیک آزادلیق سسینی اؤز اؤلکه سینده بوغوب اون مینلرجه انسان لارین قانینا سببکار اولموشدو و کیمیاوی بمبالارلا مین لرجه انسان و اوشاقین جانینی آلمیش و نهایت ده قولدورلوقلا دونیا ایله سورتوشه رک ساختا گوجونه اؤیونوب دونیایا میدان اوخویارکن قویروغو جله یه دوشدو!
***
هئچ اؤز
و ده اینانمیردی. او دوشوندو اؤز شؤکت له جلالینا. اوندا کی ساراییندا ایکن نؤکرلر، خیدمتچیلرو قاراباشلارین بوتون دقتی اوندا ایدی؛ بیری بیغینا عطیر سه پیردی، او بیرسی ایسه باشماقلارین سیلیردی. بیری دقتینی پالتاریندا توپلامیشدی و او بیریسی ده چؤکولوب دوز اولماقلا « گؤز اوسته، ثروریم ـ پیشوام » دئمک له اونا یالتاقلیق ائدیردی. صدام اؤزونو گؤزگو قاباغیندا گؤز ده ن آلیب، اوردو پالتاریندا کی دوگمه لرینه زیلله ندی : « یوخ هر شئی یولوندادیر : دوگمه لر پیریل پیریل، یاخالارین اوتوسو، هر شئی یئرینه گؤره.» لازیم دئییل حله لیک بیر نئچه کیچیک شئی لر اوسته بیرینی جزالاندیرسین. بره بؤرکو، اونو دوز ساواش قهرمانلارینا بنزه دیردی. و او دوشوندو کی تکجه عیراقین لیدری ـ قهرمانی دئییل، عرب دونیاسی داها اوندان لاییق کیمسه نی بو لیدرلیگه تاپا بیلمز. البتده کی هئچ کیمسه نی! هر شئی بوتؤولیکجه یئرینده :جسارت، کسکین لیک و مودورلوک... و نئجه کی بوینو یوغون کویت شیخ لری اونون هیبتینی گؤره رکن قویوب قاچدیلار، موطلق نهایت دونیادا اونون قاباغیندا دیز چؤکوب تسلیم اولاجاقدیر!
...بو گون سارایدا بؤیوک ضیافت وار. و او میزین باشیندا ایکی موحافیظ آراسیندا کی یانیندا دیک دوروب هر شئیی قارتال کیمی گؤز آلتینا آلمیشلار اوتوروب چوخلو یوکسک مقاملی یالتاق اوردو ظابیط لرینی (افسرهای نظامی) گؤزده ن قویوردو. هامی چاش باش دوروب پیشوانین بیر کیچیک اشارتینی گؤزله ییردیلر کی ایزین تاپیب اوتورسونلار
...بو آن بیر شاپپیلتی سسی پیشوانی خیال دونیاسیندان آییردی. بیر آن قورخدو، ال آتیب قارانلیقدا کورجاسینا تاپانچاسینی چاشقین گؤتوردو: «اولمایا سون واخت چاتدی. اولمایا گلمیش لر!» دئیه نیگارانچیلیق اوزونه قاچدی و رنگین کی آرتیق قویونون قارانلیغیندا گؤزه گلمیردی گچ کیمی آغارتدی. لاکین تئز اؤزونو اله آلدی؛ بو جله نین سسی ایدی کی سیچان توتموشدو. پیشوا بیر گولومسه دی، گویا اؤز آخماقچیلیغیندان گولمه یی گلدی. تاپانچانی بیر کؤشه یه گئری آتیب سیچان جله سینه[ تله موش] ساری یؤنه لدی. حساب الینده ن چیخمیشدی کی بو هفته نین عرضینده نئچیمجی سیچان ایدی کی جله یه دوشوردو. فاتح عسکرلر کیمی اونا بیر غرور حیسی اله وئردی. و اؤز ظفر لرینی یادا سالدی: ایران ساواشی، کویت و کوردلرله. او گئرچکده ن «قادسیه سرداری » دیر... ایچینه بیر سرینلیک اسدی: «یوخ، گله جک منیم حاققیمدا بیر قهرمان کیمی قضاوت ائده جک». قالخدی کی اوتورسون، لاکین اوتورماغا یئری یوخ ایدی. گیزلی لیک یئری [مخفی گاهی] یا یاخشی دئسک داخماسی اولدوقجا دار و بالاجا ایدی. آنجاق ائله یه بیلدی کی آیاغینی اوزاتسین. گونلرجه اولوردو کی حتتا ماوالا گئتمه یه ده بو داخمادان چیخا بیلمه میشدی. بوتون ایشلرین ائله، ائله همین قویودا قارانلیقدا گؤروردو. بونا گؤره موندار اورانی گؤتورموشدو. ایکی گؤزه تچیسی کی باییردا اونا گؤره گیزلین کئشیک وئریردیلر گئجه نی ده اونون قویودان چیخماسینی مصلحت بیلمیردیلر. و پیشوا گئجه گوندوزو باشا دوشمه ده ن دار دودوک یئددی فوت یئرین آلتیندا قبر بویدا قازیلان بیر کیچیجیک یئرده حیات سوروردو. هر سس لن یئرینده ن آتیلیردی و فلاکت لی گونلر گلیب باشا چاتمیردی اونون ایچون. ساعاتلار، دقیقه لر و ثانیه لر ائله بیل باتمیشدی و سوووشماق ایسته میردی اونون ایچون. بیرجه اونا خؤره ک گتیرنده داخمانین آغزی آچیلیب و او گؤیون رنگین ده ن باشا دوشوردو کی گوندوز دور یوخسا گئجه. اؤزو ترجیح ائدیردی کی سسلر یاتانا قدر ائله گیزلی یئرآلتی دان ائشیگه چیخماسین. و اؤز اؤزو ایله « دؤزمک گره ک، بو گونلر ده کئچه جک. موطلق کئچه جک.» دئییردی. پیشوا دوشوندو کی عیراق خالقی آمئریکالی لارین قارشیسیندا رشادت له قهرمانلیق گؤستره جک و بو گونلردیرکی اونون فدایی لاری آمئریکالی لارین قویروغوندان ائله بو سیچان کیمی توتوب ائشیگه توللاسین لار! الین اوزادیب سیچانی توتدو، توتارکن باشی آلچاق تاوانا ده یدی. بیر آن قان ووردو بئینینه :« آخماق گؤزتچیلر، سیچانین عهده سینده ن ده گله بیلمیرلر، حله ده بیلمیرلر کی پیشوا ایله سیچان بیر یئرده اولماز؟ آلچاقلار! آنجاق پولو تانییرلار » حلبه اونون الینده اولسایدی وئریب گؤزتچیلری ائله همان یئرده ن آساردی. « حیوان آنلاماز گؤزتچیلر! » بونو دوداق آلتیندا تکرار ائده رکن ایچینه بیر نفرت دولدو. موطلق اسکی گونلر اولسایدی بو ایشی ائله یردی نئجه کی اؤز آشپازینین باشینا عئینی اویونو گتیرمیشدی. لاکین.
اؤلو سیچان لارین قوخوسو گیزلی قویونون هر یانین توتموشدو. پیشوانین اوره یی بولانیردی. باشین اه ییب بورنون قویویا گلن باجانین ده لیگینه سوخدو و درین نفس آلدی « آه، تمیز هاوا! » اوره یی سینه سینده ن چیخماق ایسته ییردی، گئنه نفس آلدی. آرتیق صدامین نفس سسی اورداکی دوشن یارماجا اؤلگون سیچان نفسینین سسینده ن داها آرتیق ائشیدیلیردی.
باجانین او بیر باشی ایسه حیطه چیخیردی. اصلینده ائله هاوا ده ییشدیرمک ایچون قورولموشدو.بیر باشقا لوله ده وار ایدی کی آیاق یولویا [دستشویی] گئتمک ایچون ایدی. پیشوا دوشوندو کی اگر ائله بو گؤزه تچیلره بیر آز سرت داورانسا، موطلق دوشمانچیلیق ائدیب ائله همان یوخاریدان هاوا یولونو دا کسه جکلر.یا هئچ اولماسا اونون اؤلوسون یا دیریسین آمئریکالی لارا تسلیم ائتمک له 30 میلیون دولارا صاحیب چیخاجاقلار. آرتیق هئچ شئی بللی دئییل. هئچ کیمده ن آرخایین دئییلدی. بس گره ک چوخ دقت ائتسین. ائله ایکی هفته بوندان قاباق آز قالمیشدی کی اسکی گیزلیلیک یئری اله کئچسین و اگر واختیندا اورادان قاچماسایدیلار ایندی آرتیق آمئریکالی لارین الینده ایدی. بونو آنجاق و آنجاق یاخین لاری اله وئره بیلردیلر. بس نه طحر اولور اولسون همین گؤزه تچیلری راضی ساخلامالی دیر. مصلحت دئییل کی سیچان دان اؤترو گؤزه تچیلرله باش باشا قویسون. دوشوندو ایندی آرتیق رهبرین ریسکه قاتیلماق زام
انی دئییل، واختی ایله اونلارین حسابینا دا یئتیشر.
بیرده اونو حیرصله ندیره ن آنلاماز آمئریکالی لارین دونیانین بئله بیر مهم شخصینه بیرجه 30 میلیون دولار موکافات تعیین ائتمه لری ایدی. حال بو کی او اؤزون داها آرتیق قیمت له ندیریردی. بیر آن یادینا دوشدو کی نئجه دونیانین بیربه بیر رهبرلرینه باش ایمه دی. و اگر بیر آز اونلارین یانیندا سیاست و یومشاقلیق گؤسترسه یدی موطلق ایندی اؤز عزیز جانینی بئله تومانی ییرتیق گؤزتچیلرین الینه تاپشیرمازدی، یا دا گره ک دئییلدی بو قدر اؤزونو اوجوز قیمت له ریسکه قویسون. گولمه یی توتدو. دلی کیمی گولمه یه باشلادی.
بیر ده ن تاپپاتاپ سـسی یوخاری حیط ده ن گلدی. بیر آز بو سس لره شوبهه له ندی. تاپانچاسینی تزه ده ن گؤتوردو. دوشوندو کی خیال دیر. اونو تاپا بیلمزلر. اؤزونه اومید اوفله دی « یوخ بو گونلر ده قورتاراجاق ». اونون مین لرجه فدایی لری وار ایدی. حؤکومت معاونی ائله فدایی لرده ن سؤز ائتمیش و تلویزیون دا ائله عیراقلی لاری گؤسترمیشدی کی ایمکانسیز دیر ایندی اونو اونوتموش اولسونلار و اگر بو دوز دئییلسه بس نییه سئچگی لرده عیراق خالقینین 100 فاییزی اونا سس وئرمیشدی. تزه ده ن گولدو: «موطلق اونلار منیم قدریمی بیلیرلر. آمما اگر بو دوزسه بس بو 100 فاییز خالق هاردادیرلار؟ بو فدایی لار هانسی سیچان جهنم ده لیگینده گیزله نیبلر؟» اؤزونده ن چیخدی. باغیردی «ای خیانت کار لار! هامیز خائین سیز. بوتون وزیرلر، ظابیط لر، بوتون خالق لار. هامیسینی آسماق گره ک» ائله یاخشی اولدو کی چوخلارین جهنمه گؤنده رمیشدی. « بونلار ائله جهنم ایچون یارانمیشدیلار، بیر عده اوغرو، و خائین ده ن باشقا هئچ آد اونلارا گره ک دئییل. خائین اولماسایدیلار منیم قوچاق اوغول لاریم « عدی و قصا » کیمی رشادت له وطن یولوندا شهادتی سئچردیلر.» بیر آن قهر سسین بوغور. یاشلار گؤزلرینده گیلله نیر. سؤزسوز اونون اوغول لاری عیراقین تاریخینده بیر قهرمان ساییلاجاقلار. صدام دوشوندو کی نه قدر بئله اوشاقلاری اولسایدی اوقدر عیراقین خیرینه ایدی. بوتون دونیانین ثروتین ده اونلارا وئرسه یدی آز ایدی. فقط بیر آن دوشوندو کی بیر جه اونلار دئییل، اونون باشقا اوشاقلاری دا وار! بله اونون عائیله سی ده وار : قیزلاری، نوه لری، آروادلاری... اوره یی گؤینه دی. بیر آن اؤزونو چوخ یالقیز حیس ائله دی:« اونلار هاردادیرلار؟ » یادینا دوشدو کی چوخدان دیر هئچ اونلارا فیکیر وئرمه میش.آیلار اولار کی اونلاردان هئچ بیر خبر ده آلمامیش.سونرا اؤزونو تسکین وئردی : « چونکو بو ایشین تهلوکه سینه ده یمزدی.»
قازئته لرده گؤره ن شکیل لر یادینا دوشدو. عیراق خالقی اونون هیکلین [مجسمه سین] ییخاندا خیاوانلاردا سئوینجه یه باشلامیشدی. حتتا عزیز اوغول ـ نوه لری شهید اولاندا بو خائین میللت سئوینیب شن لیک قورموشدو. بیر آن انتقام حیسی ایچینه دولدو. دوشوندو کی بوتون عیراقی تورپاق لا بیر ائله سه ده اونون قهرین سوسدورماز. او بیلیردی کی بو خالق اونا وفاکار قالمایاجاق بونا گؤره باشقا اؤلکه لرده اؤزونه فدایی لر آختاریردی. فلسطین ده، و... اونلارین وفاکارلیغی و غیرتی عیراقلی لاردان داها آرتیق دیر، دوشوندو : « اونلار منیم قیمتیمی داها یاخشی بیلیرلر.»

ایندی اونا قالان ان سون آداملار گؤزتچیلر ایدی. آرتیق هئچ کیمه گؤوه نمیر دی. اونلاری دا ائله پولون گوجو ایله ساخلامیشدی. پول!؟ بو آن کله سینه ائله بیل قیغیلجیم[ جرقه] چاخدی. پول لاری یادینا دوشدو. قارانلیقدا الین اوزادیب پول چانتاسینی تاپدی و اونو قوجاقینا آلدی. بوتون وار یوخوندان قالان ائله بو ایدی : بیر چانتا دولو پول. حتتا آرتیق سایماغینا دا هوسی یوخ ایدی. بیلیردی کی گره ک 750 مین دولارا قدر اولسون. آرتیق یا اکسیک، نه فرق ائده ردی! قارانلیقدا چانتانی آچیب و دولارلاری الله دی. یوخ ائله بیل بو ساققاللارلا، بو پیسلیک وضعیت له دولارلارین دا دادی قاچمیشدی. آدام فلاکت ده ایکن پولون اونا نه گره ک دیر. بو نئچه آی و لاپ دوزو 9 آی اونا میلیون لار جا دولار سو ایچمیشدی. بو ده لیکده ن او ده لیگه، بو داخمادان او داخمایا، بو گیزلینجه ده ن او گیزلینجه یه... یوخ دای آرتیق دولارلار اونو ساکیت ائتمیردی. تام ترسی بو دولارلار اونو قورخودوردو. بوتون عرب لر بیلیردی کی اونون پولو چوخدور هئچ اولماسا اگر بیر گون پوللار اونا حرمت قازاندیرمیشدی ایندی آرتیق جانینی تهلوکه یه سالا بیلر. صدام دوشوندو کی بو قدر پولو اولا اولا بیر یاخشی خؤره گه نیسگیل قالمیش. بو قدر پولو اولا اولا بیر دوز عمللی یاتماقا حسرت دیر. مرمر سارایلارین یادینا سالدی. قیزیل ـ مرمر سارایلار، یام یاشیل حیاط لر، یایلاقلار.سارایلارین بیریسی اونا چوخدا یاخین ایدی. بلکه فقط نئچه کیلومترلیگینده. لاکین او گره ک حله لیک بو داخما دا، بو قارا ـ دار، پیس لیک داخما دا گوندوز له گئجه سینی باشا وورایدی. کاشکه ائله یه بیله یدی اسکی گونلری یاشاتسین. بیرجه بیر گئجه ده اولایدی یئتر. اصلا او حاضیر ایدی کی بوتون اؤلکه نی وئریب عوضینده بالاجا سارایلارین بیرینی اونا قایتاریب و اونو اؤز ایشینه بوراخایدیلار. بو سفر موطلق بیله ردی کی نئجه یاشاسین. حه، غلط ائله دی، ذات یئدی! آرتیق بو غلط لرده ن ائله مز. « آی دونیا! گلین هارانی ایسته ییرسینیز، گزین، آختارین، ائشین، هارانی ایسته ییرسینیز: حاماملاری بئله، اگر سیزه دینله ین اولسا، فقط یاخامدان ال چکین!»
***
آغیر گونلرین یاشاماسی صدامی سیندیرمیشدی. اولموشدو ائله جله یه دوشن سیچان کیمی.اوره یی اؤزونه یانیردی. ساققالینا کی آیلار ایدی قیرخمامیشدی ال چکدی، چیرکین صور ـ صوفتینه. بیر آن قورخدو. اولمایا عمرونون سونونا قدر ائله بئله قالاجاق و حیاتینی گیزلی یئرین آلتیندا قویولاردا کئچیرده جک؟ یوخ ائله ایسه اونو توتسالار داها یاخشی دیر ...!

تاراپپا وتوروپ سسی گئنه اوستده ن قالخدی. ائله بیل جیدی سس لر ایدی.حله اؤزونده دالغین ایدی کی تاپانچانی ضامین ده ن چیخارتدی. اؤزو ده بیلمه دی کی بو ایشی نییه گؤردو. «... اگر یئریمی تاپسالار هئچ اولماسا اؤزومو اؤلدوروم.حه، چوخ بؤیوک اینسانلار دا بو ایشی ائتدیلر. ائله بو هیتلر، هئچکیم بیلمه دی کی باشینا نه اویون گلدی.من ده... » آمما بیر آز کئچمه دی کی بو دوشونجه سینده ن پئشمان اولدو. تاپانچانی یئره آتدی. عزیز جانینا دوشوندو. سیچان حله اؤلمه میشدی و جان وئریردی. هر ده ن ده چابالاییردی کی جله ده ن اؤزون قورتارا. صدام اؤزونه بوزوشدو. سیچانا فیکیر وئردی. « یعنی بو دونیانین سونو دور؟ » دئیه اؤزونده ن سوروشدو.... سونرا اؤزونه گلدی « نییه گره ک منفی دوشونم. بلکه ده من دوشوندویوم کیمی دئییل. اولا بیلیر کی منیم قهرمان خالقیم آمئریکالی لاری ائشیگه سالیب و گلیب لر کی منی اؤز ساراییما گؤتورسونلر... بئله ایسه گره ک حاضیر اولام. گره ک گؤستره م کی بوتون دونیا رهبرلیگینه لاییق بیری یم » الین ساققالینا کی دای کؤکسونونه قدر یئتیشیردی چکدی. اوزون ساققالی هئچ اونو یاراشیقلی بیر رهبره بنزه تمیردی. حامام گؤرمه میش هفته لرجه باش جانی قاشینیردی. دوشوندو کی اگر اونو بو قیافت ده بو ساققال، بو اوستو باشلا گؤرسه لر، چوخ پیس اولار اوندا... شیطنت نورو گؤزونده پاریلدادی گئنه: «بیلیره م نئیله یم. بوتون بوردا اولانلاری آسماق لا بوتون پروبلم لر حل اولار و آرتیق هئچ بیر تانیق کی منی بئله سی گؤرموش اولوب الده قالماز.» اوندا گولدو.
هر شئی غریبه لیکله ساکیت گئدیردی. صدامین اوره یی یئرینده ن چیخیردی. بو سس سیزلیک اونو قورخودوردو. بیر غریبه حیس. سیچان کیمی. یوخ، منفی دوشونمه سین.« بس بو خیانتکار گؤزتچیلر هاردادیرلار؟ » بس نییه خؤره یین گتیرمه دیلر؟ قارنینا ال چکدی. آجیندان قارنینا سانجی کئچدی. حه، اؤز قارنینین سسین ائشیدیردی، سیچانین نفس لری کیمی. اونون صؤبحانه وقتینده ن کئچیردی. بس بو لعنت اولان لار هاردا قالمیشلار؟! دای، نیگاران اولدو. دوشوندو. یوخ دوشونه بیلمیردی. تاراپپا توروپ سسی کسیلمیردی. نه اولموش؟ اولمایا اونو ساتیب لار؟ اولمایا آمئریکالی لار یئرین تاپیب؟ قولاغین ایتیلتمیشدی و بیر نئچه ماشینین سسین ده ائشیدیردی کی بو یان اویانا گئدیردیلر. یانیندا تاپانچادان ساوای بیر کلاشینکف دا وار ایدی. قارانلیق دا اونو دا الله دی. و خبردار شکلینده حاضیر قالدی. اؤزو ایچون ورد اوخویوردو، و اوفلویوردو. نئچه دفعه آلله ی چاغیردی. یادینا گلمیردی کی عمرونده بئله بیر بدبخت لیک، بئله بیر هایسیزلیق گونونه دوشموش ایسه. نییه، بیر دفعه ده بئله اولموشدو آمما اوندا ائله یه بیلمیشدی قاچسین. لاکین ایندی هارایا قاچا بیله ردی؟ بوتون دونیا اونو یاخالاماغا و آمئریکایا تحویل وئرمه گه آرالاریندا موسابقه قویموشلار. یوخ، او خاطیرلامیردی کی بئله اوغورسوزلوق سوراغینا گلمیش سه!چوخ صحنه لر کینو داکی فیلم لر کیمی اونا جانلاندی. بعضی شئی لر ایسته مه ده ن یادینا دوشدو. او واخت لار کی هر ده ن ایلنجه ایچون زندان دا کی خیانت کارلارین ایشکنجه اولماسینا تاماشاچی اولوردو. حبس چیلرین ایشکنجه آلتیندا غلط ائتمه لری و دیز چؤکوب پیشوانین باشماغیندان اؤپمه لری و اونا یالوارماقلاری... ائله بیل ایندی دوز اونلارین شراییطین یاشاییردی. آمما اونلار خائین ایدی لر. اونلاری اؤلدوره یدی گره ک. اونلار رهبره خیانت ائتمیشدیلر...
***
قویونون قاپیسی یاواشجا آچیلدی. دئمک گلدیلر... گلدیلر کی اونا خؤره ک گتیره لر. یا دا گلدیلر کی اونا سارایا آپارالار. اولمایا اونو محکمه یه آپاراجاقلار...و بیری قویونون دیبینده ن باغیردی:

ـ وورمایین... وورمایین.... منم عیراقین پریزیدنتی... منم « صدام حسین...»!

خوشبختی دادنی نیست ...

آی رفیق!    از پاییز گفتی. ولی وقتی از من بپرسی پاییز، می گویم: یعنی رنگ. یعنی نفس. یعنی تابلو نقاشی. و ... باید بگویم که پاییز نروژ را ...